ԲԱՍՅՈ / Հոքուներ

Թարգմանությունը` Նաիրի Զարյանի

***

Ամառային խոտեր:

Ահա նրանք, ընկած զինվորի

Փառքի երազանքները:

***

Դաժա~ն ճակատագիր:

Այս փառավոր սաղավարտի ներքո

Այսօր ծղրիդն է ծղրտում:

***

Ի~նչ լուռ է այս այգին:

Ժայռերի սիրտն է թափանցում

Ծղրիդների խաղաղ երգը:

***

Գարու հասկից

Ես բռնեցի, որ վայր չընկնեմ...

Ինչքան դժվա~ր է բաժանման րոպեն:

***

Ձկնորսի խրճիթին մոտիկ,

Խեցու կույտերին խառնված,

Իր երգն է ծորում մի ճպուռ:

***

Օ~, այս ամայի ճանապարհը:

Խտանում է մշուշը աշնան,

Եվ չկա մի շունչ կենդանի:

***

Մի ճյուղից մյուսի վրա

Կաթիլն է հոսում կամացուկ...

Օ, գարնան անձրև:

***

Լուսինը ինչքա~ն է պայծառ...

Մակընթացության ալիքը

Կարծես մոտեցել է սեմին...

***

Այգում ձմեռվա գիշեր:

Նուրբ թելից է կարծես և' լուսինը.

Ե'վ ճպուռը հազիվ լսելի:

***

Լուսինն է սուրում ամպերի միջով,

Մինչ ամենուրեք ծառերը կանաչ

Շարունակում են անձրև թոթափել:

***

Մերկ ճյուղի վրա

Նստած է մենակ մի ագռավ...

Աշնան երեկո...

***

Ծովի հեռուն մթնում է գնալով:

Միայն վայրի բադերն այնտեղ

Կռնչում են պղտոր-ճերմակ:

ՄԱՀԱՄԵՐՁԻ ԵՐԳԸ

Իմ ճանապարհին ես հիվանդացա:

Եվ երազի մեջ ես թափառում եմ

Արևից այրված արտերի վրա: